Prinse vaan Mestreech

Oondertusse steit d'n tèller alweer op 123 lede en dik 4200 bezeuke de aofgeloupe maond! Bedaank! Sjiek tot g'r d'r zeet. Veer höbbe uuch 'n euverziech gemaak mèt alle prinse vaan Mestreech.

Tempeleers - Centrum
Euze hoege hoeglöstigheid Patrick d'n ierste, Patrick van de Weijer. Heer is bekind vaan TV Mestreech en MVV meh netuurlèk ouch es arties.

Beerbieters - Hare
De beerbieters oet Hare höbbe René d'n ierste (René Brands, 1948) oetgerope tot hunne prins. Heer koum in 1974 op het idee um C.V. de Beerbieters op te riechte boe heer 15 jaor moeljaan en veurzitter vaan is gewees. René verdeent zien cent es oondernummer.

Braniemeekers - Lummel / Nazareth
Petro d'n ierste (Petro Humblet, 1966) is de nuie prins vaan de Braniemeekers vaan Lummel en Nazareth. Leef lui opgelèt want Petro is in zien daogelèks leve biezuunder opsporingsambteneer.

Drommedarisse - Wittevrouwenveld & Wiekerveld
In 't vrowweveld höbbe ze 'ne Markies. Dit jaor is dat Markies Andy d'n ierste. Helaas functioneert de site neet gans dus kin iech uuch weijer wieneg euver Andy vertèlle. Volgend jaor de webmaster pas laote zoepe es 'r de site klaor heet.

Keemeleers - Wieck
Vors Jack LX, dat is de vors vaan de Keemeleers oet Wieck. Heer kaom in in 1965 oet zien eike en kreeg de naom Jacob Hendrik Smit. Mèt pekskes bezörge oonderhilt 'r zien vrow en twie keender.

Mallebergers - Malberrig, Malpertuis, Caberg, Aajd Caberg
De Mallebergers verzörge de vastelaovendsgekde neet allein in Malberg meh ouch in Malpertuis, Caberg en Aajd Caberg. Dee knappe kop heioonder behuurt aon Prins Thei d'n ierste, dee geer messjiens kint es Thei Reintjens (1960).

Mammoeters - Potteberg, Belfort en Haozedans
Maurice d’n Ierste is de groete prins vaan de Mammoeters. De jäög heet 'n eige vastelaovendsvereiniging genaomd de Jumbo's. Maurice Henne is gebore op 1 fibberwarie 1973 in ’t hospitaol Annadal en is 'ne goofie. 'r Lus gein blômkuul.

Mosasaurusse - St. Pieter
Prins Peter de twiede (1952) is ouch bekint es Peter Hardy en geit de Mosasaurusse oet saint pierre veur mèt de vastelaovend. Heer wèrk bij de Ierste Nederlandse Zemintfebrik. Jaorelaank bij de Techniese Deens en noe tot de Pruuse ’t höbbe euvergenome es kentoerklèrk. Gaof ouch las-curcusse en in meineg hoes is de kachel door häöm (aon)gemaak en zien de ruusters vaan d’n ope haard door de Prinselekke knoevele verveerdeg.

Sjlaaibök - Amie
Prins Bert III (1959) en Prinses Rolien zweije in Amie mèt d'n scepter. Euverdaag hèlt 'r ziech weg veur z'n vrow bei TNT Post. Ze woene aon de Dennehove, nummer 32 in Amie, same mèt hun twie dochters Jennifer en Renate. Prins Bert is gebore in 't jaor 1959, zjus wie zien vrouw Rolien. Same weure zie in hun regeringsperiode dus 100 jaor.

Sjraveleirs - Hier
De Sjraveleirs oet Hier höbbe Prins Robert I en Prinses Tasj gekoze es hun prinsepaar. Prins Robert d'n ierste woort op 30 november 1977 in Mestreech geboore en maag ziech daomèt de jongste prins vaan Mestreech neume. In Eijsde is 'r zien zis jaor awwer prinses goon zeuke. Euverdaag verstop 'r ziech bei Mitsubishi Motors en neumt 'r ziech sjef.

De Waterratte - Heugem
Mèt de Waterratte zien v'r alweer aon de lètste vastelaovendsvereiniging aongekoume. In Heugem waor d'r get consternatie toen bekint woort tot 'ne hollender dit jaor mèt d'n scepter zow goon zweijje. John d'n derde (John Lasschuit) is in 1958 in holland geboore. Heer is wel 'ne echte vastelaovendsvierder. Zien werk is beut maake en zien hobbies zien waterskieje en beut. 'n Echte waterrat dus.

Veurtot iech klachte kreig. Veer erkinne allein Vastelaovendsvereiniginge die aongeslote zien bei de SMV. Aanders kinne v'r bezig blieve ;)